Oynağa kortizon inyeksiyası: ən çox verilən altı sual

1. Kortizon oynağı «yeyirmi»?

Tez-tez və nəzarətsiz təkrarlanan inyeksiyalar qığırdaq üçün faydalı deyil. Bu, doğrudur.

Lakin göstərişə uyğun, aralarında fasilə saxlanmaqla aparılan inyeksiya bu anlamda «oynağı yemir».

Buna görə eyni oynağa inyeksiyaların sayı və aralığı hər xəstə üçün ayrıca müəyyən edilir.

2. Neçə dəfə vurmaq olar?

Universal bir rəqəm yoxdur. Qərar oynağın vəziyyətindən, əvvəlki inyeksiyaların nəticəsindən və əsas xəstəlikdən asılıdır.

Əgər bir oynaq qısa müddətdə təkrar-təkrar inyeksiya tələb edirsə, bu, əsas müalicənin yenidən nəzərdən keçirilməli olduğunu göstərir.

3. Şəkərli diabetim var, mənə olarmı?

Diabet mütləq əks göstəriş deyil. Lakin steroid qanda şəkəri bir neçə gün yüksəldə bilər.

Bu hal əvvəlcədən müzakirə olunur. Həmin günlərdə şəkərin daha tez-tez ölçülməsi tövsiyə edilə bilər.

4. Prosedur ağrılıdırmı?

İynə batan an sancı və oynaqda təzyiq hissi olur. Çox xəstə bunu qan verməyə bənzədir.

İlk 24–48 saatda ağrının müvəqqəti artması normaldır və öz-özünə keçir.

5. Hansı hallarda inyeksiya təxirə salınır?

• Oynaqda və ya üstündəki dəridə infeksiya şübhəsi varsa
• Qəfil qızartı, güclü ağrı və hərarət varsa
• Qanaxma meyli və ya uyğun olmayan dərman qəbulu varsa

Belə hallarda əvvəlcə səbəb araşdırılır. Oynaq infeksiyası inyeksiya ilə deyil, tamam başqa cür müalicə olunur.

6. Prosedurdan sonra nə etməli?

Həmin gün oynağı ağır yükləməyin, uzun məsafə yeriməyin və idmandan çəkinin.

İnyeksiya yerində artan qızartı, şişkinlik və ya hərarət yaranarsa, dərhal əlaqə saxlayın.

Ağrı azaldıqdan sonra hərəkət və məşq faydalıdır — məhz bunun üçün inyeksiya edilir.